لو كنت ما اخفش ...

موضوع: لو كنت ما اخفش ... الخميس مايو 21, 2009 1:11 pm

لو ربنا ما كانش خلق الخوف, ولو ماكانش فيه خوف فى الدنيا, كان كل واحد غير حاجات كتير فى حياتة, قارات كتير كانت هتتغير و قرارات اكتر ما كانتش اتاخدت, علاقات كتي كانت هتنقطع, و علاقات أكتر كانت هتتوطد, يمكن الدنيا ساعاتها ما كانتش هتبقى بنفس شكلها دوقتى, لأن حتى الخوف من ربنا و من فعل المحرمات و الذنوب هيختفى هو كمان

لوكنت ما اخفش كنت......... ياااااااااه

كنت عملت حاجات كتير و حاجات اكتر ماكنتش هعملها, كانت حياتى هتتغير و يمكن ما كنتش هبقى انا. بس الى متاكد منه , انى كنت هبقى عملت كل الى فى نفسى من غير خوف

مش شرط انجح فيه, و مش شرط ان قراراتى كلها تبقى صح و مضبوطة, لأن الحياة مش مضمونة و هى اساسا تجربة, انما كنت بقيت انا زى ما انا كنت عايز ابقى

..................................................

لو كنت ما أخفش,كنت دخلت الثانويه الجويه و كان زمانى دلوقتى ضابط طيار او مهندس طيران

لو كنت ما أخفش, كنت دافعت عن صداقة عمرى فى وش الى خسرونى أعز صديق لى

لو كنت ما أخفش, كنت صممت انى عمرى ما هاكل سمك, لأنى مابحبوش

لو كنت ما أخفش, كنت قلت من زمان انى بحب التمثيل و نفسى أكون ممثل, و مازلت

لو كنت ما أخفش, كنت اتعلمت بيانو

لو كنت ما أخفش, كنت قلت لناس كتير انى بحبهم, و انى نفسى نكون اصحاب

لو كنت ما أخفش, كنت روحت بيتى بدرى, يم ما مشونا من المدرسة اجبارى فى ثانوية عامة, و فضلت قاعد على سور المدرسة, خايف لاروح اهلى يفتكرونى مزوغ, و خايف لحد يشوفنى, يفتكرنى مزوغ

لو كنت ما أخفش, كنت واجهت نفسى بموت جدى و انى مش هشوفه تانى, بدل ما انا بهرب من الحقيقة دى
..................................................................

دى كانت دفعة من مخاوفى فى حياتى, اكيد فى حاجات اكتر بكتير , بس محتاجه شوية دعبسة فى النفسية

ايه رايكم كل واحد فينا يطلق العنان لمخاوفه

كى تنطلق فى انحاء المنتدى لنتعارف اكثر و اكثر